ဝိနည်းကျင့်ဝတ်ခေါ် ရဟန်းကျင့်ဖွယ် (၂၂၇)သွယ် (အပိုင်း-၁)

ဒီနေ့တော့ ၀ိနည်းတော်ပေါ့။ ပါတိမောက်ကိုအခြေခံပြီးတော့ လူတွေအနေနဲ့ သိထားသင့် သိထားထိုက်တာတွေကို ပို့ချပေးသွားမှာပါ။ ဒါကိုပို့ချပေးမယ်လို့ ကြေငြားတဲ့ နောက်တစ်ရက်မှာ အီးမေးလ်တစ်စောင် လက်ခံရရှိခဲ့တယ်။ သူ့အီးမေးလ်က ``လူတွေကို ၀ိနည်းသင်ပေးမယ်ဆိုတော့ ကိုယ့်ချီးထုပ်ကို ဖြေပြတာနဲ့ အတူတူပဲ..တဲ့။ အရှင်ဘုရား ငတ်သွားချင်လို့လား..တဲ့။ လူတွေကို ၀ိနည်းသင်မပေးပါနဲ့..တဲ့´´။ ဦးဇင်းက တွေးပါတယ်။ အခုခေတ်က လူတွေက ၀ိနည်းကို နားမလည်တော့ ထင်ရာမြင်ရာ အထူးအဆန်းလုပ်ပြနိုင်တဲ့ ပဋိယတ်မဟုတ် ပဋိပတ်မလုပ်နဲ့ နှစ်လုံးပေး သုံးသုံးပေးနဲ့ ထင်သလိုနေတဲ့ ဘုန်းကြီးအစုတ်အပြတ်တွေကို တကယ့်သူတော်ကောင်းကြီးတွေလို့ ထင်မှတ်နေကြတယ်။

ဝိနည်းတော်ကို လူတွေနားလည်ရင်တော့ ဒါမျိုးတွေ ပပျောက်သင့်သလောက်တော့ ပပျောက်သွားလိမ့်မယ်လို့ ဦးဇင်းကတွေးမိတယ်။ ကိုယ်က၀ိနည်းနဲ့ မညီတာလုပ်နေလို့ လူတွေက တွေ့သွားလို့ မကိုးကွယ်လည်းနေပေါ့။ ၀မ်းမနည်းပါဘူး။ ဘာပြုလို့လည်းဆိုတော့ ကိုယ့်ထက် ၀ိနည်းတော်ကို လေးစားတဲ့ မြတ်နိုးတဲ့ သီလရှိတဲ့ ရဟန်းတော်ကို ရှာပြီးကိုးကွယ်ကြမှာလေ။ ဒါဟာ တွေးကြည့်ရင် တကယ်ကို ကျေနပ်စရာကောင်းပါတယ်။ ဒုဿီလတွေကို ကိုးကွယ်နေတာနဲ့စာရင် ဒီအဖြစ်အပျက်က တကယ်ကို ကျေနပ်ဖွယ်ကောင်းပါတယ်။ ဒါကြောင့် ၀ိနည်းတော်ကို ပို့ချပေးရခြင်းဖြစ်ပါတယ်။

ဦးဇင်းတို့ ၀ိနည်းအကြောင်းကို ပို့ချမယ်ဆိုတော့ ၀ိနည်းသိက္ခာပုဒ်တော်တွေကို မပို့ချခင် ၀ိနည်းသိက္ခာပုဒ်တော်ကို ဘာကြောင့် ဘယ်လိုအကျိုးကျေးဇူးကြောင့် ဘုရားရှင်ပညတ်တော် မူခဲ့သလဲဆိုတာကို အရင်ပြောကြရအောင်ပါ..။

တစ်ခါတုန်းက မြတ်စွာဘုရားရှင်ကိုယ်တော်မြတ်ကြီးဟာ ဝေရဉ္စာပြည်မှာ ၀ါဆိုတော်မူတယ်။ အဲဒီအခါမှာ လက်ယာတော်ရံဖြစ်တော်မူတဲ့ အရှင်သာရိပုတ္တရာမထေရ်မြတ်က ``ပရိနိဗာန်စံလွန်တော် မူပြီးသော ဘုရားရှင်တို့တွင် အဘယ်ဘုရားရှင်၏ သာသနာတော်သည် ကြာမြင့်စွာ တည်တံ့ပါသနည်း၊ အဘယ်ဘုရားရှင်တို့၏ သာသနာတော်သည် ကြာမြင့်စွာ မတည်တံ့ပါသနည်း´´လို့ ဘုရားရှင်ကို မေးလျှောက်တော်မူခဲ့တယ်။

``၀ိပဿီမြတ်စွာဘုရား၊ သိခီမြတ်စွာဘုရား၊ ဝေဿဘူမြတ်စွာဘုရားတို့၏ သာသနာတော်သည် အရှည်မတည်တံ့။ အကြောင်းမူကား ထိုဘုရားရှင်တို့၏ တပည့်သာဝကများသည် တရားဒေသနာတော်ကို အကျဉ်းမျှ ဟောကြားရုံဖြင့် အာသဝေါကုန်ခန်း ရဟန္တာဖြစ်သွားကြကုန်၏။ ထိုကြောင့် တရားဒေသနာကို အကျယ်ကြားတော်မမူခဲ့။ ၀ိနည်းသိက္ခာပုဒ်တော်ကို ပညတ်တော်မမူခဲ့ကြကုန်။ ထိုဘုရားရှင်တို့ ပရိနိဗာန်စံလွန်တော်မူပြီးနောက် တပည့်သာဝက နှစ်ဆက်သုံးဆက် လွန်သောအခါ သာသနာတော် ကွယ်ပခဲ့လေသည်။

ကကုသန်မြတ်စွာဘုရား၊ ကောဏာဂုံမြတ်စွာဘုရား၊ ကဿပမြတ်စွာဘုရားတို့၏ သာသနာတော်သည် တည်တံ့၏။ အကြောင်းမူကား ထိုဘုရားရှင်တို့သည် တရားဒေသနာတော်ကို အကျယ်အားဖြင့် ဟောကြားတော်မူခဲ့၊ ၀ိနည်းသိက္ခာပုဒ်တော်ကို ပညတ်တော်မူခဲ့၊ ပါတိမောက်ကို ရွတ်ပြတော်မူခဲ့ကြကုန်၏။ ထိုဘုရားရှင်တို့ ပရိနိဗာန်စံလွန်တော်မူသောအခါ တပည့်သာဝက အဆက်ဆက်တို့သည် သာသနာတော်ကို အရှည်တည်တံ့ကြစေကုန်၏´´လို့ ဖြေကြားတော်မူခဲ့ပါတယ်။

အဲဒီအခါမှာ အရှင်သာရိပုတ္တရာမထေရ်မြတ်က မြတ်စွာဘုရားရှင်ကို လက်အုပ်ချီပြီးလျှင် ``သာသနာတော် အရှည်တည်တံ့စေခြင်းငှါ ၀ိနည်းသိက္ခာပုဒ်တော်ကို ပညတ်တော်မူရန် အချိန်တန်ပါပြီဘုရား၊ ပါတိမောက်ရွတ်ပြရန် အချိန်တန်ပါပြီဘုရား´´လို့ တောင်းပန်လျှောက်ထား ပြန်ပါတယ်။

(ဆက်လက်တင်ပြပေးပါမည်)
.................................................................................................မိုးသု(မန္တလေး)