ဘာသာခြားတွေ ငရဲကျကုန်မှာလား

(အရှင်ဘုရား
အယူမှားရင်ငရဲကျမယ်လို့ပြောတာ ဘာသာခြားတွေကိုငရဲကျမယ်လို့ပြောတာနဲ့ အတူတူပဲမဟုတ်လားဘုရား)

ယူရီရေ..ယူရီမေးခွန်းက သိပ်ကြောက်ဖို့ကောင်းနေပါလားကွယ်..။ ဒါပေမဲ့ ဦးဇင်းအတတ်နိုင်ဆုံး ကိုယ်စွမ်းအားဥာဏ်စွမ်းအား ရှိသလောက်ဖြေပေးပါ့မယ်။

``အယူမှားရင်ငရဲကျမယ်ဆိုတာကတော့ ဟုတ်ပါတယ်။ ဒါပေမဲ့ အယူမှားတာနဲ့ ဘာသာခြားနဲ့ က သေချာတွေးကြည့်ရင် မသက်ဆိုင်လှတဲ့ အရာတစ်ခုပါ။ ဘာသာခြားတိုင်း အယူမမှားသလို အယူမှားတိုင်းလည်း ဘာသာခြားမဟုတ်ပါဘူး။´´

``ဗုဒ္ဒဘာသာရဟန်းပါလို့ အမည်ခံထားကြတဲ့ ပုဂ္ဂိုလ်တချို့တောင်မှ ဘုရားဟောတရားတွေကို မှန်မှန်ကန်ကန် မတွေးတတ် အဓိပါယ်မကောက်တတ်တော့ အယူမှားသွားတယ်လေ။ မြန်မာပြည်မှာ အဲလိုဘုန်းကြီးတွေ အများကြီးရှိပါတယ်။ ဘုရားရှင် သက်တော်ထင်ရှားရှိစဉ်ကကို အယူမှားသွားကြတဲ့ ရဟန်းတွေရှိပါတယ်´´

အယူမှားရင် ငရဲကျတယ်ဆိုတာက မက္ခလိဂေါသာလတို့ရဲ့ အယူမျိုးကို ပြောတာပါ။ မက္ခလိဂေါသာလရဲ့ အယူကို အနည်းငယ်မျှ သိသာရုံဖော်ပြပေးပါ့မယ်။

``အဖေ အမေရဲ့ ကျေးဇူးဆိုတာ မရှိဘူး။ သူ့အသက်သတ်ခြင်း သူ့ဥစ္စာခိုးခြင်း သူတစ်ပါးရဲ့ မိန်းမကိုကြာကူလီရိုက်ခြင်း မုဒိမ်းကျင့်ခြင်းစသော မကောင်းမှုတို့ကို ပြုလုပ်ခြင်းတို့ကြောင့် အကုသိုလ်ဆိုတာမဖြစ်ဘူး၊ အကုသိုလ်ဆိုတာ မရှိဘူး၊ အဖေကို သတ်ပစ်လို့လည်း ဘာမှမဖြစ်ဘူး၊ အမေကိုသတ်ပစ်လို့လည်း ဘာမှမဖြစ်ဘူး၊ လုပ်ချင်တာသာ လုပ်ပစ်လိုက် မကောင်းမှုဆိုတာ မဖြစ်ဘူး´´

``လုပ်ချင်တာလုပ်၊ လုပ်နေတုန်းလေး လုပ်ကာမျှမတ္တပဲ၊ ကောင်းတာပဲလုပ်လုပ် မကောင်းတာပဲလုပ်လုပ် လုပ်ကာမျှမတ္တပဲ၊ ငရဲဆိုတာလည်း မရှိဘူး၊ နတ်ပြည်ဆိုတာလည်း မရှိဘူး´´ဆိုတဲ့ အယူမျိုးကို သေသည့်တိုင်အောင် မစွန့်လွတ်ပဲ လွဲမှားစွာနဲ့ယူခဲ့ရင် ငရဲကျမည့်အယူမှားလို့ ပြောတာပါ။´´

တကယ်တော့ ဘယ်ဘာသာဝင်ပဲဖြစ်နေပါစေ..။ ဆိုခဲ့တဲ့မကောင်းမှုတွေကို လုပ်ရင်တော့ငရဲကို သွားရမှာပါပဲ။ အဇာတသတ်ကြည့်လေ..။ အဖသတ်ရင် အပြစ်မရှိဘူးလို့ ယူဆပြီး သူ့အဖေကိုသတ်မိတော့ ငရဲရောက်သွားရတာမို့လား။ ငရဲဆိုတာနောက်ထားပါ။ မျက်မှောက်ဘ၀မှာတောင် နိုင်ငံအုပ်ချုပ်သူများရဲ့ ပြစ်ဏ်ပေးခြင်းကို လက်တွေ့အရင်ခံစားကြရတာပဲမို့လား။ မှုခင်း၈ျာနယ်တွေ ဖတ်ကြည့်ပေါ့။

လူတိုင်းဟာ မှန်မှန်ကန်ကန် လမ်းညွှန်ပေးနိုင်သူ မရှိလို့ပဲဖြစ်ဖြစ် ကိုယ်တိုင်က မလိုက်စားလို့ပဲဖြစ်ဖြစ် အယူမှားနိုင်ကြတာပါပဲ။ အရှင်မဟာကဿရဲ့ ဇနီးဟောင်းဆိုရင် ပရိဗိုဇ်မ(ဘာသာခြားမယ်သီလ) ဖြစ်သွားသေးတယ်လေ။ နောက်ပိုင်းကျတော့ နည်းမှန်လမ်းမှန်ကို ညွှန်ပြနိုင်တဲ့သူနဲ့တွေ့တောမှ အယူမှားကိုစွန့်လွှတ်ပြီး ၀ိပဿနာတွေပွားများလိုက်တာ ရဟန္တာထေရီမကြီးဖြစ်သွားခဲ့ပါတယ်။

ယူရီပြောသလို အယူမှားတိုင်းသာ ငရဲရောက်မယ်ဆိုရင် အရှင်သာရိပုတ္တရာတို့ အရှင်မောဂ္ဂလာန်တို့လည်း ငရဲရောက်သွားတော့မှာပေါ့။ သူတို့လည်း ဘာသာခြားကနေ ဗုဒ္ဒဘာသာထဲ ၀င်လာတဲ့သူတွေပဲလေ။
`` အယူမှားတိုင်း ငရဲရောက်မယ်ဆိုတာ ယူရီဘာသာရေးစာတွေကို သေချာမဖတ်လို့ ပြောတဲ့စကားပါ။ ဘုရားရှင်က အယူမှားရင် ငရဲကျမယ်လို့ မဟောခဲ့ပါဘူး။´´

ဦးဇင်းပြောတာမယုံရင်တော့ ယူရီဘာသာ ဘုရားတရားတွေကို ဖတ်ရှု့ကြည့်ပါကွယ်..။

``ဦးဇင်းနောက်ဆုံးပြောချင်တာကတော့ အယူမှားတိုင်း ငရဲမရောက်သလို အယူမှားတိုင်လည်း ဘာသာခြားမဟုတ်ပါဘူးကွယ်´´

နတ်ပြည်မှာ ဘာသာခြားနတ်တွေ ရှိတယ်လို့ ဘုရားဟောစာပေတွေထဲမှာ အများအပြားတွေ့ရှိနိုင်ပါတယ်။ ဘာလို့လည်းဆိုတော့ သူတို့လည်း ဘာသာခြားဆိုပေမဲ့ အသိစိတ်ဓာတ်က မှန်မှန်ကန်ကန် မြင်နိုင်တဲ့ စွမ်းအားရှိနေတော့ အလှုအတန်းတွေ ပြုလုပ်ကြတယ်လေ။

အခုဆိုရင် အမေရိကန်ဘီလျံနာတွေဟာ သူတို့ရဲ့ပိုင်ဆိုင်မှုထက်ဝက်ကို အများအကျိုးပြု လူမှုရေးအဖွဲ့အစည်းတွေကို လှုမယ်လို့ ကတိပြုလက်မှတ်ထိုး လိုက်ကြတယ်ဆိုတာ ယူရီလည်း ကြားမိမှာပါ။ သူတို့တွေဟာ ဘာသာခြားတွေပါ။ ဒီလိုဘာသာခြားတွေလည်း နတ်ပြည်ရောက်နိုင်တာပေါ့။ ဥပမာ-ခရစ်ယာန်ဘာသာဆိုရင် မေတ္တာ ကရုဏာ မုဒိတာ ဆိုတဲ့ သူ့တို့ဘာသာမှာပါတဲ့ အဆုံးအမအတိုင်းသာ ကျင့်သွားမယ်ဆိုရင် ဗြဟ္မာပြည်တောင် ရောက်နိုင်ပါတယ်။

ကဲဒီလောက်ဆိုရင် ယူရီသဘောပေါက်လောက်မယ်လို့ မျှော်လင့်မိပါတယ်။ သဘောမပေါက်ရင်လည်း မပေါက်ဘူးလို့ ပွင့်ပွင့်လင်းလင်းပြောစေလိုပါတယ်။ ဦးဇင်းထပ်ရှင်းပြပေးပါ့မယ်။
....................................................................................................မိုးသု(မန္တလေး)


(ဒီမေးခွန်းကို ယူရီဆိုတဲ့ ဆေးကျောင်းသား ချာတိတ်ကလေးက လွန်ခဲ့တဲ့ နှစ်တွေက မေးထားခဲ့တာပါ။ နောက်ပိုင်းမှ သူနဲ့ ရင်းနှီးတော့ ဦးဇင်းကို အမြင်ကတ်ကတ်နဲ့ အချွန်နဲ့မတဲ့ သဘောနဲ့ မေးထားတာ သိချင်တာလဲပါတာပေါ့လို့ သူက ပြန်ပြောပြတယ်။ အဲဒီတုန်းကတော့ ယူရီသို့အိတ်ဖွင့်ပေးစာလို့ ခေါင်းစဉ်တပ်ခဲ့တယ်။ အခုပို့စ်ခေါင်းစဉ်ကို ပြန်ပြင်လိုက်ပါတယ်။)